بعض قصائد الشاعر الكبير محمد بن عباد السلولي

البارحة بانت النجمة وانا واعي
البارحة بانت النجمة وانا واعي =ارعى نجوم تجلت في مطالعها
ارعى نجوم لها بالكون مطلاعي =عزي لمن بات سهران يطالعها
مالي جدى الا مبادل روس الاكواعي =ورفعة يدين لخالقها تضرعها
لعل ساعة اجابة دعوة الداعي =تكتب على حزة الدعوة وترفعها
تبرد لهيب الضمير وتصلح اوضاعي =وسحابة الهم عن قلبي تقشعها
قلب غدا للعنا والهم مرباعي =ومشاكل حطته مركز تجمعها
ترعى همومه على جاله بلا راعي =واليا اقبل الليل عادت له وريعها
لا دقت ابهام كفي وسطى الاصباعي =هلت عيوني على الماضي مدامعها
تطري لها حاجة ما هيب تنباعي =بين الامل والرجا والياس واقعها
افز لا من طرت واقوم مرتاعي =واسج عن هرجة العالم وانا معها
اسج في وضع مد خالي ومطلاعي =واعاتب النفس واندبها واراجعها
لو كان مالي عن المكتوب مجزاعي =ونفس الفتى ما يسليها توجعها
في غبة بحور همي يصفق شراعي =وامواج فكري تصارعني واصارعها
لا حشم الليل وجه السبع باقناعي =وقصر حجاب التستر دون سابعها
يبدي لها في سما ذكراي مشلاعي =وابني قصور الامل وافتح شوارعها
فان هب من نسمة التوفيق ذعذاعي =غنت طيور السعادة في مرابعها
والا فيا صعب جيتها ومرجاعي =وحبال وصل شديد الوقت قطعها
تخالف الركب في دنيا التمتاعي =احد ينوخ بها واحد يودعها
للشر زارع وللمعروف زراعي =واهل الصنايع تفاجيها صنايعها
الطيب للطيبين فجوجه وساعي =ويضيق باللي رديات روابعها
يوم ان ولد الردي طيبه تصناعي =الاجواد فعل الجمايل من طبايعها
لو حاول اللاش يطلع فوق الارفاعي =الناس تغلب طبايعها تطبعها
ما ينفع الا كريم بوه نفاعي =ولا تنبع العزه الا من منابعها
واللي يشوف الرجال انصاف وارباعي =تشوفه الناس في واطي مواقعها
الكبر ثوب شقوقه مالها ارقاعي =ولا يعز الرجال لا تواضعها
ومن لبس له من الثياب البيض لماعي =اقل نقطه تدمرها وتطبعها
ومن عز نفسه عن المشروه ما ضاعي =ومن لا يجنب عن الشرهه تقوبعها
الانسان في ما تحب النفس طماعي =ما سدها عن مطامعها ولا اقنعها
تحرص على الرزق بانواع التجشاعي =والرزق في كف معطيها ومانعها
ما هوب حصر الحريص وقوة الساعي =وهايب الله على خلقه يوزعها
حتى طيور السما ما باتت جياعي =واللي على بطنها واللي على اربعها
تسرح خماص البطون وتضوي شباعي =ما حسبت ربح شاريها وبايعها
المال والعمر في يسرع اسراعي =ودايع عند رب ما يضيعها
تغينم الفي دام الفي ما راعي =اليا قصر فيها ردت ودايعها
فاما كسبنا جميل طيبه يشاعي =والا فلا خير في الدنيا وجامعها
فيا الله يا اللي له الاملاك خضاعي =يا معتلي فوق سبع وسبع واضعها
تجعل لنفسي عن الزلات مناعي =من رادع الدين والايمان يردعها
لا مزع القدر ثوب العمر مزاعي =والنفس قرب من الدنيا موادعها
لا قامت الروح مني تقرع اقراعي =والاجل منها دنى والموت ينزعها
تجعل لها من جنود حماك فزاعي =في ساعة طبها ما عاد ينفعها

انا وين وابا لقا اللي باحطه على يمناي

انا وين وابا لقا اللي باحطه على يمناي =خوي تشوقه المطاريش والخوه
نزيه المسار اللي على رغبتي ومناي =زمام المراجل قاضبه طبع وربوه
لا هاض المجال وزعزعوا للسفر طراي =يسوقه على مشي الخلا شوق وجروه
ليا قلت له يا طيب الفال ويش الراي =مع القار والا مع خلا خالي جوه
ترا ما معك معواد دون السبوع الجاي =تجهز وشغلك قبل وقت السفر سوه
يقول المشاغل علتي والمسير دواي =ابشر على خوة هل العرف وانوه
هذا اللي ليا منه حصل طاب لي مسراي =اعرف الدروب ولي بها عهد وضروه
لا ناحرت مبدا الجدي وسهيل من وراي =ظلام الدجى لمعرب الخال ما توه
ابنصا وليف حدني لين جبت اقصاي =تربع على عرش الضمير وشعم ضوه
وليف نواني بالقطيعه وقص رشاي =عزم بالمفارق واختلف نوي ونوه
ادوج بعد فرقاه وامشي بليا راي =واوقف على المدهال وادوج وابوه
واعدي على روس المبادي واجر عواي =وامد النضر مع صحصح خالي دوه
يروى خياله كلما جيت في مبداي =ولا حولت ما القى لا خياله ولا هوه
وعودت اصفق كف يمناي في يسراي =ولا عاد لي حيل ولا عاد لي قوه
وساد القلق وضعي وعم الظلام اجواي =وجا للسهر في خاطري ود وعنوه
عسى البارق اللي في غزير المطر سراي =يحول على دار رحل صوبها نوه
وليف ملك قلبي وحسي وكل اعضاي =وفي القلب عن غيره من العالم سلوه
اشوف العرب في الزين والطبع منه وجاي =وفي زينه وطبعه على غيره علوه
وراعي مضاليل ليا سلهمت باغضاي =اطمن نضر عيني سحا منه ومروه
لا منه نضرني نضرة الواثق الرماي =لزوم اغوى لو هرجتي ما بها غوه
اعيش بوجوده مستوى العالم الهاي هاي =ولا غاب عني جمع الوقت لي سوه
واخفي دموعي ما بي احد يشوف ابكاي =واجامل عن انضار الشماميت واموه
اجامل على الانضار واصبر على بلواي =مقاريد خلق الله على الطيب تفوه
قدام العرب كنه من اقصى العرب واعداي =واكن الغلا والشوق في القلب من جوه
سق الله زماني يوم خلي على مشهاي =ليالي تقافت كلها عطف وحنوه
ليالي الغلا والجانب الدمث واللباي =على اول مبادي حبنا توي وتوه
وذا للحين يا مشكاه لله ويا مشكاي =يا صعب المواجه والرجا فيه يا شوه

مجاراته مع مسفر الاكلبي

امس العصر عالي المرقاب شرفته =لاني بطرب ولا لي حاجة فوقه
لكن من ضيقة في البال ولافته =ادله القلب لا ينتل معلوقه
وفيها تذكرت ابو فراج واخترته =اللي بصرف الجواهر حامي سوقه
نوادر الشعر عاشقها وعاشقته =يجنيه جني الثمر من زاهي عذوقه
يا مسفر القلب عذبني وعذبته =عيا يوالف زمان كاثر بوقه
لا قلت يا قلب جاملني وجاملته =عيا على منهجه الاول وطاروقه
كم مجلس جين عاني له وجنبته =لو ان كبدي على المجلاس محروقه
لا شفت بعض الاوادم فيه ما طقته =الجاهل اللي لسانه يضرب شدوقه
متشيخ في مساكين مزعمته =زعامة بين عارية ومسروقه
فلو ان بعض العرب يبقى على سمته =حافظ على مستواه وحفظت حقوقه
الرجل مادام صامت جمله صمته =ولا احد درى عنه ويش اللي بصندوقه
واليا تكلم معك لحظه وكلمته =حددت شخصيته لا اوحيت منطوقه
وتزداد به معرفه لا منك جربته =في موقف يرجع الرجال لعموقه
هذي معاناة قلب شام من وقته =ما هي توجا معشوق لمعشوقه
وصلاة ربي نهاية كل ما قلته =على النبي عد نو ناضت بروقه

رد الشاعر/ مسفر بن فراج المنيعي الأكلبي:

يا الله يا اللي خلقت ادم وصورته =ومكونه لين سار الدم بعروقه
يا خالق الكون من لا شي وكونته =ومسير السحاب وبا امرك تسوقه
تبرج لعين لذيذ النوم عايفته =كثير الاوقات حلو النوم ما اذوقه
واللي جبرني على ما اخفيت واعلنته =رسالة شرحها وافي ومرفوقه
من شاعر خاطري طرب لسالفته =ورسالة اللي ما ابيه اقول ملحوقه
اللي تشوفه يا ابن عباد قد شفته =باسبابهم شف عباة الناس مشقوقه
بعض الرجاجيل نطقة قد معرفته =وتروح مستامنه في علم ويبوقه
تلقاه مع شلة دايم موالفته =على علوم الردى ما هيب مسبوقه
يزعم بروح على ماش مزايمته =ما غير لمروجين الهرج ما سوقه
مجالس الطيب عايفها وعايفته =عساه مرواح طير قطعت سبوقه
واقبل تحيات من بالرد كلفته =على مجاراة مثلك زايد شوقه
يا اللي ما خليت شي ما تطرقته =سوالف من مصادر ناس موثوقه
وصلاة ربي عدد ما زاف من نبته =في مرتع عقب سيله زاف ملوقه
على النبي عد ما تقرا وغيبته =واعداد ما كل عود شرب بعروقه

هذي القصيدة في حفل تكريم الشيخ / داخل عاتق الغيداني رئيس مركز عرجاء
الشاعر/ محمد بن عباد السلولي الشهراني

يقول السلولي يوم غنـا وبالـه طـرب=بعد وصل ديرة حرب من دار شهرانـي
سلامي على لافي سلام الوفا عن قـرب=سلامٍ يليـق بقـدر خطـلان الايمانـي
وعلى كل غيداني وساير قبائل حـرب=هل الطيب والناموس من ماض الازماني
هل السيف وأهل الخيل ومفرجين الكرب=لاجا للرمـك عجـه وللملـح دخانـي
ومن جالهم تقدير من شرق ولا غـرب=وشمال وجنوب وكل من جالهـم عانـي
وانا ماخلجني مثـل شعاركـم ياحـرب=شربتوا بحور الشعر في كـل ميدانـي
ليا قلت هذا الشاعر اللي شربها شـرب=طلع كل واحد منكم اعبر مـن الثانـي
لو الشعر يؤخذ كان قوم عليكـم حـرب=على سالم ومسـرح سيـقً الاضعانـي
لو إن لمحارب مايحصـل عليكـم درب=يعود عن الطمعات عايـف وخسرانـي
ملكتوا اللسان اليعربي والكـلام الـذرب=مثل ماملـك فـوق البسيطـة سليمانـي

صح لسانك طرح رائع

ابيض وجه

عز الله انك جملت في الشاعر الكبير هذا لانه غير مشهور مثل أبن جدلان وأبن ثايب الا انه صديق لأبن جدلال وبينهم قصائد بدع ورد أشكرك ياطلال على هذا الطرح وأطمع منك في المزيد

» قصيدة الشاعر/ محمد بن حمد بن رفده بمناسبة حفل تكريم الشيخ/ عبدالله بن محمد بن حجلا
» من جديد الشاعر الكبير سعد بن جدلان أتمنى تعجبكم :
» مقتطفات من قصائد الشاعر سعد بن جدلان الاكلبي
» قصايد الشاعر محمد بن حمد بن فطيس المري
» قصيدة الشاعر محمد بن فطيس المري (يا هــيــه)