الحب والشوق والضيقات والصده
حطت على وجهي المقبول ماريه
أحدا زهاله سواد الخال في خده
وأحدا بخده من هموم الزمن كيه
يقفي بهى الشك صوب اللوم ويرده
وإذا رجع مالقى إلا رسم أثاريه
وتزيد به ضيقة العشاق وتهده
ويبكي على حاجة ماهيب مبكيه
يزل وآقول يمكن ماهو بوده
غلطه ويمكن على ماقيل عفويه
حتى ولو قالها قاصد ومن جده
يشفع لحاضر غرامه زين ماضيه
أعشقه وأشتاق له وأهواه وأوده
من الغلا نسبة المليون بالميه
ألد عيني لكن ماهي بمنلده
هو أول الحب في عيني وتاليه
وأغر قلبي على النسيان وآهده
لاشك عيا من النسيان موليه
عزي لحالي على فرقاه منحده
وعزي لقلبي ليا من حل طاريه
يتوق توق الوحش في كف من هده
لاطار مالد عينه صوب راعيه
ياشين فرقا الذي تغليه وتوده
لاصار حيا ولاتقدر على جيه
ياجعل ربي يصبرني على الشده
ألين مايجتمع غالي بغاليه
لو طال صبري عليه وطالت المده
ياحي شوفه قبل لاموت ياحيه
