تكفين يمه خلي الباب مصكوك

وقالت لي اسمع كنت احس بصوابك
ابكي دموعي هم واشكي على ابوك


كنت ارتجي ظلك وماطر سحابك
ونسمة هواك تشيل عن دربي الشوك


ارضي عذابي لجل اشتت عذابك
مابي تحس انك اذا طحت متروك


عهد الطفولة كنت احظن ثيابك
لارحت تدرس وانتظرهم يردوك


واشرب بقايا مابقا من شرابك
لارحت مستعجل وخايف يخلوك


اساعدك تحفظ اجلد كتابك
اضمك اذا رديت متعب ومنوك


اليوم ليش اليوم زاد اكتئابك
والي يبونك من سوايك عافوك


قل لي علامك اليوم قافل بابك
عن ربعك وناسك كفا باب مصكوك


والناس الي تحرق لهم مابقابك
ماظنهم كثر الي فيك حبوك


ابسئالك وانطر حبيبي جوابك
تدري بئان الناس مافيوم حسوك


امسح دموعك لايخيب الرجا بك
منت الذي يضعف وينهار ارجوك


واقفت وانا ساكت وفكري متشابك
وجسمي كنه باسيجات مشبوك