الصوره اللي بجوالني تعذبني
ياكثر ماجيت أبمسحها وأخليها
ياللي جفيت وجفاك المر ذابحني
عقبك وجيه البشر مانيب أدانيها
من يوم حبك غزى القلب وتملكني
قطعت كل العلاقات وطواريها
أقرأ رسايلك ودموعي تسابقني
وأرد وأقرأ الرسايل وأحتفظ فيها
أنت آخر أنسان هاقي منه يصدمني
والظاهر أن هقوتي بانت مواريها
لو الوصايا لو أحتريت تنفعني
ياكثر ناس على ذوقي بأوصيها
ليت الفرح بنك لاجيته يسلفني
وأقصده راحتي وحقوقها فيها
من كثر ماكنت جارحني وظالمني
قمت أعزل جروحك بقلبي وأسميها
تدري وش اللي يبكيني ويضحكني
أنك محامي قضيتنا وقاضيها
وتدري متاك تعرف قدري وتفقدني
لأرخصت نفسك لشخص مايراعيها
وبكره ليا هملوك الناس تذكرني
وتقول عزاه عيني من يداويها
مادام غيري على قلبك مشركني
وش هو له أعلق الآمال وأبنيها
يكفيني أنك رحلت ومنت عايفني
هذا عزا النفس من كثرة بلاويها
وأهديتك دموع من طعنتك تحرقني
وأنت اللي تستاهل الدنيا ومن فيها
وأهديتني جرح موجعني وعاجبني
لأن الهدايا على مقدار مهديها
صحيح حنا أنتهينا بس صدقني
والله أن تبقى هوى روحي وغاليها
مفضوح راعي الهيام ونظرته تغني
ملامحه واضحه في وجه راعيها
لكل داء دواء لو هو متعبني
إلا محبتك أعيت من يداويها
وأن قلت علمني أنسى لاتعلمني
دنياي لامن نسيتك ويش تاليها
فارقتني وضحكتك عيت تفارقني
والله يلعن أبو الفرقا وطاريها
مقدر أفكر بغيرك وأنت عارفني
عشان حاجه بقلبي مقدر أخفيها
وأخاف لاحبني غيرك وعاشرني
يشوف صورتك في عيني ويوصيها
نشدت عنك وسمعت اللي يفرحني
وأرتاح صدري من هموم يحاتيها
تبي تعرف وش على الفرقا مصبرني
أنك بخير وحياتك مهتني فيها
من يوم ماغبت والوحدة تعذبني
أقرأ رسايلك في حرقه وألآحيها
وأشوف صورتك ودموعي تسابقني
وياكثر ماجيت أبمسحها وأخليها